الخميس 28 مارس 2024 مـ 07:02 مـ 18 رمضان 1445 هـ
موقع هدف
موقع هدف
موقع هدف
موقع هدف
رئيس مجلس الأمناء مجدي صادقرئيس التحرير محمود معروفأمين الصندوق عادل حسين

فاروق فلوكس يكشف تفاصيل انضمامه للإخوان ولقاء حسن البنا: كان عندي 5 سنين

فاروق فلوكس
فاروق فلوكس

كشف الفنان فاروق فلوكس، معلومات جديدة حول فترة انضمامه لجماعة الإخوان.

وقال فاروق فلوكس، عن فترة انضمامه للإخوان خلال حواره في برنامج الستات: كان عندي 5 سنين، وكنت ساكن في ميدان عابدين، وكان الإخوان بيمشوا لابسين لبس كشافة وكان عاجبني اللبس والشكل ده وقولت أنا عايز أنضم ليهم، وعرفت إن فيه شارع بعدنا كان ليهم مكان فيه وقولت لوالدي أنا عايز أنضم ليهم علشان أمشي في الطابور ده، قالي اللي أنت عايزه اعمله واللي أنت شايفه صح اعمله واللي تلاقيه غلط أو خطر تعالى قولي.

وتابع: لما روحت وانضميت لقيتهم بيقعدونا شوية أو يحفظونا قرآن، وبعدين أنا عايز استلم اللبس عشان أمشي معاهم في الطابور، قالولي هنروح نحضر خطبة للشيخ حسن البنا، وروحنا في الدرب الأحمر في مقرهم الأساسي، وطبعًا أنا مكنتش عارف حاجة كان كل همي اللبس والشكل، وحسن البنا ده إنسان طويل كده ولابس بالطو وطربوش وصوته جهور، وكان بيقول حاجات أنا مش مُلم بيها ولكن فيها آيات قرآنية وأنا راجل بحب ديني.

وأضاف الفنان فاروق فلوكس، عن كواليس تدريبات الإخوان: نزلونا في البدروم وكان كله رمل، وكان فيه سلك شائك وإدونا عصاية غلية وقالولنا إسحفوا على الرمل وحاولوا تعدوا من تحت السلك الشائك، وأنا محبتش حد يفرض عليا رأيه وكمان دي مش طبيعتي وأنا مش عدواني ومش ده الهدف اللي رايح علشان أنا كنت رايح علشان الدربوكة، وعلى مضد عملت التجربة الأولى والسلك الشائك شد في هدومي، وبعدين خرجنا من التجربة قولتلهم هروح أنضف هدومي وهاجي تاني، وروحت حكيت لوالدي اللي حصل قالي أنت إيه رأيك؟ قولتله أنا مش رايح تاني، ومروحتش تاني.

وأضاف: بعتوا يجبوني قولتلهم لأ أنا مش عايز أجي وحالتي الصحية مش هتسمح، وفضل كرهي لهذا المكان لغاية ما روحت ثانوي، وفي ثانوي قابلت واحد تاني كان لما الظهر يأذن يشدني يقولي يلا يا أخي علشان نصلي طب أنت مالك يا أخي؟ هو أنت تعرف أنا متوضي ولا لأ؟ كنت أقوله لأ مش هاجي، وعرفت إن هو منضم للإخوان لما كنا بنعمل مظاهرات في المدارس وأنا كنت في مدرسة الإبراهيمية، وكان البوليس بيجي يضرب علينا قنابل مسيلة للدموع، لقيت هو بيجيب جردل فيه رمل وبيتسقبل القنابل، طب هو عرف منين ده؟ ده زميلنا في المدرسة يعني مين اللي علمه؟ عرفت إن هو منضم للإخوان، وأنا تكويني من صغري مبحبش الناس دي.

وعن سبب تسميته باسم فلوكس، أكد  فاروق فلوكس أن صديقه هو من أطلق عليه هذا الاسم: أنا اسمي الحقيقي فاروق توفيق صالح مبارك، وكان في واحد من كلية دار العلوم كان بيلبس تي شيرت طويل وسروال وقبقاب ونظارة غامقة ومكنش بيقلعهم حتى بينزل الماية بيهم، هو لفت نظري وأنا كنت شقي وسميته الأقرع، وجري ورايا وقالي لابد من ضربك بالحزاء على أم رأسك يا فلوكس، قولتله كله كوم والكلمة دي كوم عيب.

وتابع: جه المشرف بتاعنا قالي معلش يا أستاذ فاروق فوتله، وأنا عديت الموضوع وقابلته قالي أنت بردو فلوكس، ومن ساعتها والكلمة ماسكة فيا وبقى اسمي فلوكس.

وأردف: الشاعر أحمد رامي شرحلي يعني إيه فلوكس، وقالي فلوكس يعني أحد أسماء الأسد، وهو النبات اللي بينبت في المياه الراكدة.