رانيا يوسف: أحمد الفيشاوي مش عاتق الستات الأكبر منه وهذا موقفي من الزواج منه (فيديو)

قالت الفنانة رانيا يوسف: "مش فاهمة إيه قصة الدريس كود اللي الفنان حسين فهمي عملوا مخصوص علشاني".

الهدف من المهرجانات

وتابعت خلال لقائها ببرنامج "حبر سري" الذي تقدمه الإعلامية أسما ابراهيم بقناة "القاهرة والناس": "الهدف من المهرجانات يشوفوا رانيا يوسف هتلبس إيه وأنا بقول اهم هلبس إيه هلبس فستان أو حاجة لافتة للنظر، والدريس كود مش هنلبس فيه ينيوفورم لكن حاجة تليق بالحدث".

الدريس كود وغرض حسين فهمي

وأضافت: "أنا مش ضد الدريس كود، وما اتهيأليش إن الفنان حسين فهمي يقصد أننا ما نلبسش حاجة مفتوحة أو أوفر أوي، لكن الطبيعي أن مهرجان سينمائي دولي إننا نلبس كويس أوي مش هنلبس عبايات، ولازم لما يبقى فيه حدث نلبس زي ما برة بيلبسوا، ما حدش بيأفور في اللبس عندنا أنا الوحيدة اللي أفورت في اللبس وخلاص الموضوع خلص".

قصة بلاغ رانيا يوسف عن المتحرشين

وعن بلاغها ضد المتحرشين في 2020، علقت: "فيه ناس اعتذرت وبعتت لي على الإنستجرام وفيه ناس اتاخذت ضدهم الإجراءات القانونية وأنا ما تابعتش، ولما حسيت إن فيه ناس راجعت نفسها قلت خلاص سامحي بقى، أنا شخصية مسامحة بس اللي يجي جنبي أخربشه، وأنا من حقي آخد حقي".

حقيقة ارتباط رانيا يوسف وأحمد الفيشاوي

وعن قصة صورتها مع الفنان أحمد الفيشاوي، قالت: "احنا كنا بنصور فيلم ورد ريحان، واحنا ما اتخطبناش ومفيش الكلام ده، بس الصورة كانت دعاية من الفيلم، وحبينا نهزر مع بعض وهو راجل لطيف ودمه خفيف، وأحمد مش عاتق الستات الأكبر منه ولا الأصغر منه لكننا زملاء وهو أخ عزيز عليَّ، ولو اتقدم لي مش هوافق عليه، لإن ليَّ شروط وحاجات معينة بتريحني لو ما حستهاش مش همشي في السكة".