الخميس 28 مارس 2024 مـ 01:21 مـ 18 رمضان 1445 هـ
موقع هدف
موقع هدف
موقع هدف
موقع هدف
رئيس مجلس الأمناء مجدي صادقرئيس التحرير محمود معروفأمين الصندوق عادل حسين

محمد سامي: قصة مسلسل جعفر العمدة مش تعدد الزوجات.. وعقيدتي أول الحكاية بطل

فن  محمد سامي
فن محمد سامي

كشف المؤلف والمخرج محمد سامي تفاصيل رحلته في صناعة مسلسل جعفر العمدة، متحدثًا عن تفاصيل شخصية الفنان محمد رمضان وقصة العمل الرئيسية، والمقرر عرض العمل في الماراثون الرمضاني 2023.

وحل المخرج محمد سامي ضيفًا على برنامج مساء Dmc للإعلامي رامي رضوان، وتحدث عن رحلة صناعة مسلسل جعفر العمدة، قائلًا: لما جيت أعمل مسلسل آدم اشتريت كم مسلسلات جبار، فبدأت أتفرج عليها وفي منها مسلسلات عجبتني أوي، طبعًا تقنيات التصوير كانت قديمة، لكن أنا كنت بتفرج على الدراما، وأنا كنت بخرج مسلسل آدم كنت عايز أدخل أتفرج عليها تاني، والمسلسلات كانت قائمة على حبك للبطل، إلا أوبرا عايدة كل اللي فيه عظماء، شيل منه أوبرا الأستاذ يحيى الفخراني شوف هيبقى عامل إزاي، مسلسل الضوء الشارد شيل منه رفيع بيه العزايزي.

 

وتابع محمد سامي: بقى عندي عقيدة ثابتة إنه أول الحكاية بطل، وبيحصل في كل الحياة في أي حاجة فيه حد الناس كلها بتحبه، وليه أقعد الـ 30 حلقة أتفرج على واحد غلس، فبحس إن لازم أعمل حاجة فيها جذب جماهيري، وهي الشخصية ومش هقول إن أنا شوفت شخصيات في الشارع وبعملها هي هي، وبشوف تفاصيل عند الناس، وببنى شخصية جذابة طول الوقت في دماغي راجل أو ست، ومش حتى الشخصيات الرئيسية، وبحط في الدرج شخصيات عديدة، هما دول اللي هيعملوا التعايش مع الدراما.

 

وأردف محمد سامي: مثلًا جعفر العمدة اتجوز كتير فهل ده صح ولا غلط، أخد تفصيلة مثلًا من شخصية راجل بتاع حيوانات كان في بيته متجوز أكتر من واحدة وكل واحدة في دور، وهو عايش لوحده، وكل يوم في بيته ساعة الخصوصية، تفصيلة غريبة وحقيقية، وبدور على شخصية الناس كلها هتحبها، ولما الشخصية ممثل جامد بيعملها بتضرب في عشرة، ومدير تصوير جيد بتضرب في عشرة، وفي كل عنصر بنختاره الموضوع بيعلى.

 

واستكمل محمد سامي: أنا بطرح القصة والموضوع، بطرح إن واحد عنده تعدد زوجات، وانت بتشوف ده حققله حياة سعيدة، صح أو غلط، مفيد أو لا، والمسلسل بتاعي المتصدر عنه إن قضيته تعدد الزوجات، وده مش هو خالص ديه قصة من قصص المسلسل، وده وصف في حياة الراجل، وقصة الراجل بينه وبين نفسه في جرح قديم، وفي حاجة تاني، وفي رحلة البحث عن ابنه.

 

محمد سامي يكشف تفاصيل مسلسل جعفر العمدة لمحمد رمضان

وتابع محمد سامي حديثه عن تفاصيل المسلسل، حيث قال: لو اتكلمت عن المسلسل في سطر هقول إن هو راجل مزواج معلم ابن عز من السيدة زينب اسمه جعفر عبد الجواد خضر العمدة، امه بنت حسب ونسب، أبوها أكبر عطار في الحسين، اسمها وصيفة، الراجل والده توفى زمان، لقى نفسه شايل أسر، شقيقه الأكبر شخصيته ضعيفة، له أخت واحدة، أمه شخصية رائعة، والراجل ده حصله إن من 19 سنة مراته بتخلف في المستشفى، ومراته التانية اللي هنفهم له أتجوزها في أول سنة حامل، وبتشوف ابنه اتولد اتخطف في الحضانة، ومراته التانية في ناس ضربوها في الشارع وسقطوها، وده أول مشهد في المسلسل، وبعد 19 سنة مانع زوجاته من الخلفة، علشان مش عايز يتوجع تاني، وميعرفش مين اللي عمل فيه كده، وميعرفش ابنه ميت ولا عايش، لو ميت هيرتاح وهيعرف يكمل، وجرحه مش بيتنسى.

واختتم محمد سامي: إزاي الراجل ده عايش مع همه، طب هل زيجاته العديدة هي اللي بتلهيه عن الهم، هل هو هيلاقي ابنه، وهل هيعرف مين اللي عمل في ابنه كده، وهو مسلسل درامي تشويقي رومانسي، والموضوع الأساسي بين جعفر العمدة وابنه، والموضوع مش هو التعدد وده جزء من الحكاية، والطريقة ديه هتكون ممتعة للجمهور.