حورية فرغلي بعد استئصال الرحم: بعتبر نفسي أم كل بنت وولد في مصر

كشفت الفنانة حورية فرغلي، أنها تعتبر نفسها أما لكل بنت وولد في مصر بعد خضوعها لعملية استئصال الرحم لمعاناتها من أورام سرطانية.

وقالت حورية فرغلي لـ القاهرة 24: الأمل اللي كان عندي إني أخلف راح، ودلوقتي بعتبر إني أم كل بنت وولد في مصر، وبشكر الجمهور على دعواتهم ليا وبشكر والدي ووالدتي على وقوفهم بجانبي.

حورية فرغلي تكشف تفاصيل حالتها الصحية بعد استئصالها الرحم

وعن حالتها الصحية، كشفت حورية فرغلي أنها تشعر بألم مكان الجرح ومن المقرر أن تزيل سلك الجراحة يوم الخميس المقبل.

وأضافت: خلاص الأورام الوحشة كلها اتشالت بعد ما حاولت كتير وعملت عمليات كتير وشيلت أورام كتير وبترجع تاني والدكتور قال مش هينفع كده، وكان عندي أمل في ربنا إني ممكن أقابل الزوج اللي أتجوزه وأخلف لكن خلاص الأمل راح ويمكن ربنا شايل ليا الأفضل.

وكانت حورية فرغلي تصدرت محركات البحث على جوجل، بعد ترويج الإعلامي نزار الفارس لشائعة خطبته منها، وهو ما نفته، وقالت في تصريحات تلفزيونية: حاسة إني عايشة في كابوس وفي غابة، والمذيع ده كان مريب وهو من أول ما دخل كان غريب وبيصور كتير، ومعنديش أي مشكلة الحلقة تنزل، عشان الناس هتعرف كده متفقة معاه ولا لأ.

واستكملت حورية فرغلي مستنكرة: هو لأني عندي مشكلة في مناخيري يبقى غلبانة بقى ويحصل فيا كده؟.